De wëssenschaftleche Rot, deen am Kader vum Pilotprojet gegrënnt gouf, huet als Missioun, säin Avis iwwert d'Entwécklung, d'Ëmsetzung an de Progrès vum Pilotprojet ofzeginn.
De wëssenschaftlechen Rot setzt sech zesummen aus:
- Dr. Pierre Escudé (Universitéit Stroosbuerg)
- Dr. Christine Hélot (Universitéit Bordeaux)
- Prof. Dr. Antoine Fischbach (Observatoire national de l'enfance, de la jeunesse et de la qualité scolaire)
- Dr. Marc Schmidt (Centre de Logopédie Lëtzebuerg)
- Prof. Dr. Claudia Polzin-Haumann (Universitéit vum Saarland)
De Pilotprojet „ALPHA - zesumme wuessen″ gëtt vum LUCET (Luxembourg Centre for Educational Testing) am Laf vun deenen nächste Joren am Kader vum nationale Schoulmonitoring, de längsschnëttlech ugeluechten „Épreuves Standardisées“ (kuerz ÉpStan), wëssenschaftlech begleet. Dofir ginn d’ÉpStan och an deenen nächste Jore kontinuéierlech ausgebaut.
An de franséische Pilotklassen am éischte Joer vum Cycle 2 ginn, genau wéi an deenen Klassen, déi ob Däitsch alphabetiséiert ginn, Tester zum Lëtzebuergesch Héierverstoen an zur Mathematik duerchgefouert. Well an de franséische Pilotklassen den Accent net um Däitschen, mee um Franséische läit, ginn zur Erfaassung vun de Virleeferfäegkeete vun der Alphabetiséierung op Franséisch folgend zwee zousätzlech ÉpStan-Tester duerchgefouert:
- compréhension de l'oral en français
- premiers pas vers l'écrit
Esou wéi fir déi aner ÉpStan-Tester, ginn dës konzeptuell änlech Tester vu Fuerscher an Enseignantën zesummen an Aarbechtsgruppen entwéckelt.
Nieft de Kompetenztester, wäerten d’Schüler aus dem Pilotprojet och déi existéierend ÉpStan-Questionnairen zur Motivatioun, fir op Franséisch ze léieren, ausfëllen. D’Elterequestionnairen, wéi et se haut gëtt, ginn net just duerchgefouert, mee och erweidert (zum Beispill bezüglech der Aart a Weis, wéi Elteren hir sproochlech Méiglechkeeten aschätzen, hir Kanner an hirem schoulesche Léieren ze ënnerstëtzen).
Nom erfollegräichen éischte Pretest am éischte Joer vum Cycle 2 zu Schëffleng am Hierscht vum Schouljoer 2022/23, gi säit dem Schouljoer 2023/24 all déi franséisch Pilotklassen unhand vun deenen neie validéierte Kompetenztester evaluéiert. Baséierend op dësen duerchgefouerten Tester sinn am Fréijoer/Summer 2024 preliminär Resultater zu de Kanner hire Kompetenzen an hirer Motivatioun ze erwaarden a ginn an engem éischte Rapport verëffentlecht. Am Laf vun deenen nächste Jore wäerten zousätzlech längsschnëttlech Resultater vun de Schüler verëffentlecht ginn, déi nei Erkenntnisser zum Pilotprojet liwweren.
Wéi och bei der Begleedung vun den internationalen ëffentleche Schoulen, ass de Verglach vu Kompetenztester an ënnerschiddleche Sprooche psychomeetresch limitéiert, well et och am Pilotprojet verhältnisméisseg kleng Fallzuele sinn. Aussoen zur Léiermotivatioun an Aschätzunge vun den Eltere sinn awer direkt vergläichbar.
Spotlight Artikel Nationaler Bidungsbericht 2024
Ab Oktober 2024 organiséiert d'Uni Lëtzebuerg Fokusgruppen mat den Eltere vun de Schülerinnen a Schüler, déi um Pilotprojet deelhuelen. Dës Sessioune behandele verschidden Themen, dorënner d'Motivatioune vun den Eltere fir de Choix vun der Alphabetiséierungssprooch, d'Orientéierungsprozedur, d'Elterenbedeelegung, hir Zefriddenheet mam Projet, an d'Relatioun an d'Kommunikatioun tëscht der Schoul an der Famill.
De SCRIPT evaluéiert déi follgend Schlësselkriterien:
Zuel vun a Grënn fir d'Zyklusverlängerung
D’Zuel vun den Zyklusverlängerunge fir d’Schüler, déi um Projet deelhuelen, gëtt mat der Unzuel vun den Zyklusverlängerungen vun de Jore virdrun an de véier Pilotschoulen verglach. Zur selwechter Zäit ginn d'Grënn fir d'Zyklusverlängerung ënnersicht.
Participatioun vun de Schülerinnen a Schüler
Gruppendiskussioune mat de Schülerinnen a Schüler (sougenannte Colabs) wäerten e Feedback iwwer d'Motivatioun an d'Wuelbefanne vun de Studenten an de Pilotklassen opzeechnen, evaluéieren a liwweren. D'Gruppendiskussioune wäerten am Dezember 2024 a Januar 2025 stattfannen an d'Resultater wäerten am Summer 2025 zur Verfügung stoen.
Aschätzung vun de Pilotschoulen duerch d'Enseignanten an d'Schoulpresidenten
D'Perceptiounen an d'Bewäertunge vun den Enseignanten an de Schoulpresidente gi wärend dem Reseautage, de geplangte Gruppendiskussiounen an am EpStan Questionnaire gesammelt an dokumentéiert. Déi éischt Datesammlung wärend dem Reseautage huet am Juni 2024 stattfonnt. D'Gruppendiskussioune wäerten am Dezember 2024 ufänken an d'Donnéeë fir den EpStan Questionnaire ginn all Schouljoer am November gesammelt. En éischten Iwwerbléck vun de Resultater wäert fir de Summer 2025 prett sinn.
Aschätzung vum Wëssenschaftleche Rot
D’Aschätzungen an d’Bewäertunge vum Wëssenschaftleche Rot ginn emol am Joer wärend hirer Visitt a Form vu Questionnairen, Fokusgruppen an Interviewe gesammelt an dokumentéiert. En definitive Bericht gëtt am Summer 2026 publizéiert.
Aschätzung vun de regionalen Direktiounen
D’Aschätzungen an d’Bewäertunge vun de regionalen Direktioune ginn a Form vun Interviewe gesammelt an dokumentéiert. Dës Entrevuë wäerten am Fréijoer 2026 stattfannen, dat um Enn vun der Pilotphase, fir dass eng ëmfaassend Bewäertung vum Projet ka gemaach ginn. D'Resultater gi fir de Summer 2026 erwaart.
En definitive Bericht iwwert all d'Evaluatioune gëtt am Summer 2026 publizéiert.
De Learning Lab vun der Europäescher Kommissioun analyséiert déi direkt an indirekt Auswierkunge vum Projet.
